பழம்பொருள்
மூச்சதனை உள்நிறுத்தி மூக்குநுனி பார்த்திருந்து
மூலப்பண் டாரமவன் முகவரியைத் தேர்ந்திருந்தேன்
மூலத்தின் மூலமவன் முகவரியில் நில்லாது
ஊனுயிரை ஊடறுத்து உலவுவதும் உணர்வேனோ
உணர்விட்ட உண்மைப்பொருள் உட்கலந்து உவகைதரும்
புனல்இட்ட மணியொளிர்ந்து புனல்ஒளிரும் நிறம்மாற்றும்
உடையிட்ட ஊடெனவும் பாவெனவும் நூல்வளரும்
அன்னவகை யப்பொருளின் இயல்புணர மாட்டேனோ
மாட்டாமை தனைமாற்றி மயக்கறுத்து உய்வளிக்கும்
இருப்பியக்கம் இரண்டினுக்கும் இடமளித்து உலகியற்றும்
ஒண்பொருளின் உயர்நோக்கை ஓங்கிவளர் அருட்திறத்தை
உளம்கொள்ள வொண்ணாது உன்மத்தன் ஆவேனோ
ஆவதுவும் அழிவதுவும் வாலறிவன் ஆக்கினையால்
வீழ்வதுவும் வாழ்வதுவும் வல்வினையின் ஊட்டுதலால்
பூப்பதுவும் பூத்தமலர்ப் புனைவதுவும் அவன்தோளில்
என்றிருந்து தனிப்பொருளின் தண்ணடிகள் காண்பேனோ
கண்டுணர்ந்து உய்த்திருக்க கருவூலம் உள்ளிருக்க
தூய்மையினும் தூய்மையென திகழ்கின்ற சோதியினை
கங்குபகல் காலமுற்றும் கலந்திருந்து களிப்பேனோ
கட்புலனில் அகப்பட்டு கதிமறந்து நிற்பேனோ
நின்று நிலைத்தப்பொருள் உயிர்த்துகளில் உலவுபொருள்
பற்று அறுத்தப்பொருள் பரஞ்ஞானம் தந்தபொருள்
கற்று தெளிந்தவர்க்கு கலவிகொள்ள உற்றபொருள்
வேற்று மனத்தினனாய் உற்றதனைத் தெளிவேனோ
தெளிந்துவளர் சித்தத்தில் ஜீவியப் பொருளெனவும்
விரிந்தநற் பேரறிவாய் விளைந்த நல்முத்தெனவும்
மலர்ந்தசெம் மனங்களிலே மாசற்ற சோதியுமாய்
விளங்குமவ் உயர்ப்பொருளை கற்றென்று தேர்வேனோ
தேர்ந்தநற் பொருளெனவே செப்பிடுவர் அறம்நின்றோர்
சேர்ந்துறையும் காலமுற்றும் தீதறவே காத்துநிற்கும்
நேர்ந்தவெவ் வினையதனை வேரறுத்து நேர்படுத்தும்
சாரமாம் சித்பொருளை சார்ந்திருக்கப் பயில்வேனோ
பயின்றிங்கு பெற்றதெல்லாம் வானுலவும் பேரண்டம்
தெளிந்தவுயிர் உணர்ந்ததுவோ நித்தியப் பேரமைதி
உழன்றுதினம் திரியுமனம் ஒன்றுமிடம் கண்டுணர்ந்து
சத்சித்து ஆனந்தத்தில் தனியிடத்து அமர்வேனோ
தனியமர்ந்து அறிந்தனரே நற்பொருளை நாடிநின்றோர்
திறம்வியந்து போற்றினரே அஃதுணர்த்தும் பெருநெறியை
சிரம்தாண்டி நின்றிலங்கும் சின்மயமாம் சித்பொருளை
புலன்தாண்டி உணர்வதற்கு உற்றநிலை வாய்த்திடுமோ
வாய்த்தவுயிர்த் துகளதனில் உடற்கூற்றை முடிச்சிட்டு
தூயத்தபருப் பொருளதனில் சூக்குமங்கள் பிணைத்திருத்தி
வேய்த்தவிழுப் பொருளெனவே விளங்குகின்ற விண்ணரசை
காய்த்தமனம் கனிந்தேத்தி கதியுறுமோ என்னுயிர்மூச்சு
--0--
